Hela Rahas

Hela Rahas Official Web Portal

කතරගම දෙවියන්ගේ පිහිට ලබාගන්නෙ මෙහෙමයි

ජාති, ආගම්, කුල-මල භේදයකින් තොරව මෙරට ජනයා කතරගම දෙවියන් කෙරේ භක්තියෙන් කටයුතු කරති. කතරගම දෙවියන්ට වඳිති, පුදති, පිහිට පතති. එනිසාම දෙවියන් කෙරේ විශ්වාස නැතැයි කියන්නෝ රහසෙන් වරක්, දෙවරක් කතරගම ගොස් කඳසුරිඳුන්ගෙ පිහිට පතන්නට ක්‍රියා කරති. තම පිහිට පැතුවන් කිසිවකුට අයහපතක් අකටයුත්තක් කරන්නට හෝ ඒ අයට පිහිට අවැසි තැන පිහිට නොවී සිටීමට කඳසුරිඳුන්ද කටයුතු කර නැති බව බොහෝමයකගේ විශ්වාසයයි.

ශ්‍රී ලංකාවේ මහා තෙද බලැති කතරගම දෙවියන් වැඩ සිටින කතරගම මහා දේවාලයේ ගිනි පෑගීමේ අවස්ථාවට සහ සම්බන්ධව වැඩසිටි අතිපූජනීය බළන්ගොඩ මහ නාහිමිපාණන් වහන්සේට වරක් කතරගම දෙවිඳුන් ජීවමානව ගිනි පෑගීමේ අවස්ථාවට සම්බන්ධ වන අයුරු දකින්නට ලැබී ඇත. ඒ බව උන්වහන්සේ හා සම්බන්ධ පොතපතෙහිද සඳහන්ව ඇත.

බළන්ගොඩ ආනන්ද මෛත්‍රිය හිමියන් කිසිදා කිසි අයුරකින් බොරුවක් නොකියනා බව රහසක් නොවේ. එනිසාම කතරගම දෙවිඳුගේ ජීවමාන සම්ප්‍රාප්තියද ලේසියෙන් බැහැර කළ නොහැක්කකි. එසේම කතරගම දේවාලයේ වැඩවසන කතරගම දෙවිඳුන්ගෙ තෙදබල අනුහස් අප්‍රමාණය. එනිසාම එහි හාස්කම් නොඅඩුව නොනැසී පවතියි.

දුටුගැමුණු මහ රජුගේ යුද ජයග්‍රහණය නිසාම කතරගම ඉදිකෙරුණු මහ දේවාලයේ පූජාවත්, වතාවත් එදා සිට අද දක්වාම නොඅඩුව පැවතෙන්නේ ඒ මහා අනුහස් නිසාමය. ලක්‍ෂ සංඛ්‍යාත බැතිමතුන්ගේ පුද පූජාවන්ට පාත්‍ර වූ කතරගම පුදබිමේ අසීමිත දේව බලය නොඅඩුව පැතිරී පවතින බවත්, කතරගම දෙවියන් ඒ සියල්ලන්ටම සෙත සදන බවත් ජනයා හදවතින්ම විශ්වාස කරති.කතරගම දෙවිඳුගේ අත් දොළසින් ලග්න දොළහා නිරූපණය කෙරෙන බවටත්, රක්ත වර්ණය කුජ, අඟහරුගේ බලය ඉසමතු කොට දන්වන්නක් බවටත් විශ්වාසයේ පවතී. කතරගම දෙවිඳුන් සහ කුජ ලේ මෙන්ම රතු වර්ණයද මෙහෙයවන බවත් සත්‍යයකි. එනිසා මිනිසුන් කතරගම දෙවියන්ගෙන් පිහිට ලබන්නට සිතන්නේ නම් ඒ වෙනුවෙන් වටහා ගතයුතු කරුණක් වෙයි.


ඒ මිනිසෙකුට, දෙවියකුට ළංවිය හැක්කේ පස්පව්, දස අකුසල් මූලයන් මුලින් උපුටා දැමීමෙන්ය. අධම ක්‍රියාවන්ගේ නියැළෙමින් දෙවියන් යැදීමෙන් හෝ පුද පූජා පැවැත්වීමෙන් ඒ කිසිවකුටත් කතරගම දෙවිඳුගේ පිහිට, ආරක්‍ෂාව ලබාගත නොහැකිය. එවැනි කළු චරිත දෙසට කිසිවිටෙක කතරගම දෙවිඳුගෙ බැල්ම යොමුවන්නේද නැත.

කෙසේ නමුත් කතරගම දෙවියන් නිතරම සිය පිහිට ලබාදෙන්නේ ජීවිතයේ පස්පවින් වැළකී දස අකුසලයන්ගෙන් වැළකී දැහැමිව කටයුතු කරන අයටම පමණකි. දුකක්, කරදරයක් වූ පසු හදිසියේ පේවී දෙවියන් සොයා යන්නාට කතරගම දෙවියන් පිහිට වෙනවාද යන්න සැකසහිතය. එනිසාම කතරගම දෙවියන්ගේ පිහිට ලබා ගැනීමේ විස්මිත රහස සැඟවී ඇත්තේ කුසලයේ හැසිරීම තුළය.

මල්, පහන් පුදා තෙරුවන් නමැද සිත පහන් කරගෙන දෙවියන්ට නිතිපතා පින් අනුමෝදන් කරන්නේ නම් ඔබට දෙවියන්ගේ ආරක්‍ෂාව මෙන්ම දේව ආකර්ෂණයද නිතැතින්ම ලැබෙනු ඇත. එසේ කටයුතු නොකර අසරණ වූ පසුව පැය ගණන් ස්තෝත්‍ර ගායනයෙන් පමණක් කතරගම දෙවියන්ගේ ආකර්ෂණය හෝ පිහිට ලබාගත නොහැකිය.

යන්ත්‍රයකින් හෝ මන්ත්‍රයකින් කතරම දෙවියන්ගේ පිහිට ලබාගත හැකි යැයි කෙනකු තුළ වැරැදි විශ්වාසයක් තිබෙන්නට බැරි නැත. එහෙත් එය සාර්ථක සිතුවිල්ලක් නොවේ. යන්ත්‍රයක් කරේ හෝ ඉණේ ගැටගසාගෙන එය අතගාමින් මට කතරගම දෙවියන්ගේ පිහිටයි, ආරාක්‍ෂාවයි කියා සිතමින් සියලු වැරැදි කරයි නම් එවන් අයට කතරගම දෙවියන් බලන්නේ නැත.

යම් කෙනකු දැහැමි දිවියක් ගෙවමින් එම ආකාරයටම උදේ, සවස මට කතරගම දෙවියන්ගේ පිහිටයි, ආරක්‍ෂාවයි යනුවෙන් මතක් කරයි නම් නිසැකවම ඔහු කෙරේ කතරගම දේව බැල්ම යොමුවනු ඇත. ඔහුට කරදරයක්, දුකක් වූ විට පිහිට වනු ඇත. එසේම ඔහුගේ ව්‍යාපාර කටයුතු, ආර්ථික කටයුතුවලට බාධා ඇත්නම් ඒවා දුරලා වාසනාව පාදා දෙනු ඇත.

මේ සත්‍ය හොඳින් වටහාගෙන තම අනාගතය සාර්ථක කරගනිමින් දිනෙන් දින දියුණු වීමට කැමැත්තක් වේ නම් ඒ සඳහා කතරගම දෙවියන්ගේ පිහිට, ආරක්‍ෂාව මෙන්ම උදව්වද ලබා ගැනීමට ඔබට අවශ්‍ය නම් අදම ඊට අවශ්‍ය ආකාරයට හැඩගැසීමට සිතට ගන්න. උදේ – සවස බුදුන්ට මල්, පහන් පූජා කරන්න. පස්පව් කිරීමෙන්, දස අකුසල් කිරීමෙන් වළකින්න. කරන, කියන සියල්ල දැහැමිව, සාධාරණව කරන්න.

අන් අයට යහපතක් වන ආකාරයට සියල්ල සිදුකරන්න. එවිට ඔබ කතරගම දේව ආරක්‍ෂාව ලබන්නකු බවට නිරායාසයෙන්ම පත්වනු ඇත. ඉන්පසු ඔබ ඔබේ බලාපොරොත්තු දෙවියන්ට කියන්න. ස්තෝත්‍ර, නැකැත් ඔබ දන්නා විදියට ඔබට තේරෙන අයුරින් පවසන්න. නිසැකවම ඔබේ බලාපොරොත්තු ඉෂ්ටසිද්ධ වෙන ආකාරයට ඔබට විශ්මය දනවනු ඇත. දෙවියන් ඔබ සමීපයේම බව ඔබට දැනෙනු ඇත. ඔබව දියුණුවේ හිනිපෙත්තටම රැගෙන ගොස් මිස දෙවියන් ඔබව අත්නොහරිනු ඇත. කිසිවකු හරියට හඳුනා නොගත් කතරගම දෙවියන්ගේ විදිහ එයයි.
ප්‍රවීණ ජ්‍යොතිෂවේදී ටී. හෙන්රි බෙම්මුල්ල