Sat. Aug 8th, 2020

Hela Rahas

Hela Rahas Official Web Portal

සත්‍ය සිදුවීම් පාදක කරගෙන ලියවුණු කෘතීන්

1 min read

ඕනෑම පොතක් කියවීමට පුරුදු වී සිටින අය නම්, බේදයක් නැතුව තමන් දන්නා ඕනෑම භාෂාවක, විවිධ ඝනයේ සහ ශෛලියේ නවකතා, කෙටිකතා ආදී ඕනෑම පොතක් කියවන්න පුරුදු වෙලා ඉන්නවා. නමුත් ඇතැම් අය ඉන්නවා පොතක් කියවන විට බොහෝ තේරීම් වලට ලක් කරන. ඇතමුන් කැමතියි මනඃකල්පිත ව්‍යාජ සිද්ධි වලින් පිරුනු පොත් වලට වඩා සත්‍ය සිදුවීම් පාදක කර ගත් සැබෑ ජීවිතයේ කතා රස විඳින්න.

මේ කාට කාටත් ගැළපෙන විදිහට අපි මේ ලිපියෙන් ලෝකයේ ඉතාම ප්‍රසිද්ධ, සත්‍ය සිදුවීම් පාදක කරගත් කෘතීන් කිහිපයක් ඉදිරිපත් කරනවා. ඔබත් ගුණාත්මක පොතක වටිනාකම දන්නා කෙනෙක් නම් මේ පොත්වල පරිවර්තනයක් හෝ සොයාගෙන කියවන්න උත්සාහ කරන්න.

ද ගුඩ් පීපල් – හැනා කෙන්ට් (The good people by Hannah Kent) මේ කතාවේ දැක්වෙන්නේ 19වන ශත වර්ෂයේ මැද භාගයේ අයර්ලන්තයේ ජීවත් වූ ඈන් රෝෂ් නම් කාන්තාවක් මයිකල් ලීහි නම් කුඩා පිරිමි ලමයකුගේ මරණය වගකිව යුතු බවට පවසමින් ඇයට විරුද්ධව නඩු පැවරීමක් පිළිබඳවයි. කෙසේ හෝ ඇය විසින් ඒ සැබෑ පිරිමි ළමයෙක් නොව සුරඟන පිරිමි ළමයෙකු(Changeling) බව ඔප්පු කිරීමෙන් පසු ඇයව නිදොස් කොට නිදහස් කරන ලදී. ( “චෙන්ජ්ලින්”- Changeling, කෙනෙක්‌ යනු, යුරෝපයේ ජනකතා වලට අනුව සුරඟනන් විසින් බිලිඳු අවධියේදී රැගෙන යාමට සොරාගන්නා මිනිස් ළමයෙකු වෙනුවට, මෙලොව තබා යන සුරඟන ළමයෙකි)

එම්ප්‍රස් ඕර්කිඩ් – ඇන්චී මින් (Empress Orchid by Anchee Min) කිංග් (Qing) රාජ වංශය අවධියේ චීනයේ බලයට පත් වූ වැන්දඹු අධිරාජ්‍යවරියක් වන සික්ෂි (Cixi) සහ ඉන්පසු ඇය වසර 47ක්‌ චීනය පාලනය කල අයුරු පිලිබඳ ප්‍රබන්ධ විස්තරයක් අඩංගු කතාවකි.

ගර්ල් වේට්ස් විත් ගන් – ඇමී ස්ටුවෝර්ට් (Girl waits with gun by Amy Stewart) කොන්ස්ටන්ස් කොප් යනු උප ෂෙරිෆ් පදවියට පත්වූ ඇමරිකාවේ පළමු කාන්තාවයි. නමුත් ඇයටත් යම් අපරාධයකට මුහුණ දීමට සිදු වීමෙන් පසු ඇය සිය සොහොයුරියන් සමඟ වැරදිකරු නීතිය ඉදිරියට ගෙන ඒමට හමුදාවට බැඳේ. කෙසේ හෝ ඇය අවසානයේ නිව් ජර්සි පොලිස් බළකායට සම්බන්ධ රැකියාවක් ලබාගනී.

බියුටිෆුල් එක්සයිල්ස් – මෙග් වයිට් ක්ලේටන් (Beautiful exiles by Meg Waite Clayton) සුප්‍රසිද්ධ යුද පුවත් වාර්තාකාරිනියක් වන මාර්තා ගෙල්හොර්න් මැඩ්රිඩ් හි ස්පාඤ්ඤ සිවිල් යුද්ධය පිළිබඳ වාර්තා කරමින් සිටින අතරතුර අර්නස්ට් හෙමින්වේ සමඟ ආලයෙන් වෙලේ. ඔවුන් දෙදෙනා පසුකාලිනව ලොව පුරා සංචාරය කළ අතර ක්ලේටන් සඳහා, ඔවුන්ගේ සම්බන්ධතාවය පිළිබඳ මෙම ප්‍රබන්ධ කතන්දරය ලිවීමට පසුබිම් සැපයීය.

සැල්වේජ් ද බෝන්ස් – ජෙස්මින් වෝර්ඩ් (Salvage the bones by Jesmyn Ward) පොතෙහි කතෘ වන වෝර්ඩ් 2005 අගෝස්තු මාසයේ අවසන් කාලයේදී මිසිසිපි වල සිටින තම පවුල බැලීමට යාමට තීරණය කළේ ඇය මිචිගන් විශ්වවිද්‍යාලයේ ඉගැන්වීම් ආරම්භ කිරීමට පෙරයි. ඇගේ එම තීරණය නිසා එම කාලයේ සිදු වූ කැත්‍රිනා නම් හරිකේන් කුණාටුවට මුහුණ දීමට ඇයට සිදු විය. මෙම පොතේ දැක්වෙන්නේ මේ සිදුවීම පාදක කරගත් කතාවකි.

ආර්තර් ඇන්ඩ් ජෝර්ජ් – ජුලියන් බාර්න්ස් (Arthur and George by Julian Barnes එංගලන්තයේ ගමක් වන මහා වර්ලි (Great Wyrley) හි 1903 දී ඉතාම සාහසික ඛේදවාචකයක් සිදුවිය. ඉතාම විශාල සංඛ්‍යාවක් හරකුන්, අශ්වයන් සහ බැටළුවන් කපා කොටා මරා දැමුණු අතර ඒ සඳහා වැරදිකරු ලෙස ජෝර්ජ් එඩල්ජි නම් පුද්ගලයා සිරගත කරන ලදී. නමුත් වසර තුනක් තිස්සේ ඔහු බරපතළ වැඩ සහිතව සිරගත වී සිටීමෙන් අනතුරුව ෂර්ලොක් හෝම්ස් කතෘ වන ආතර් කොනන් ඩොයිල් විසින් ඔහු නිර්දෝෂ බවට ඔප්පු කර නිදහස් කරවන ලදි. මෙම සිදුවීම “The great wyrley outrageous” නමින් අදටත් හැඳින්වෙන සත්‍ය සිදුවීමකි.

සී වට් අයි හැව් ඩන් – සාරා ස්මිට් (See what I have done by Sarah Schmidt) 1892 දී පොරවෙන් කොටා ඝාතනය කරන ලද බෝර්ඩන් නම් පවුලේ සාමාජිකයන් සම්බන්ධ සිදුවීම( Borde Axe murders) ඇමරිකාව කැලඹූවේය. මෙහි ප්‍රධාන සැකකරු වූයේ එම පවුලේම දියණියක් වූ ලිසී බෝර්ඩන් නම් තැනැත්තියයි. “සී වට් අයි හැව් ඩන්” වෙත පාදක වූයේ එම සත්‍ය සිදුවීම වන අතර, මෙම කෘතිය 2018 ප්‍රබන්ධ කතා සඳහා වන ‘විමෙන්ස් ත්‍යාගය’ සඳහා ද නිර්දේශ විය.( Women’s prize for fictions)

ද මෑන් හූ වෝක්ඩ් අවේ – මෝඩ් කැසී ( The man who walked away by Maud Casey) ඇල්බට් ඩැඩාස් නම් පුද්ගලයා 19වන ශතවර්ෂය අවසානයේදී අවාසනාවන්ත ලෙස මානසික රෝගියකු බවට පත් විය. ඔහුට විවිධ ස්ථානවලට යාම සඳහා දැඩි පෙළඹවීමක් ඇති කරන ඔහුගේ රෝග තත්ත්වය සොයා ගැනීමට කිසිසේත් නොහැකි විය. බොහෝ අවස්ථාවලදී ඔහු නතරවන්නේ අලුත් රටකට ගොස් වන අතර ඔහු එතැනට ගියේ කෙසේ දැයි ඔහුටවත් මතක නැත. ඔහු දශක ගණනාවක් එම රෝගයට ප්‍රතිකාරයක් සොයමින් කල් ගත කළේය.

මර්ඩර් ඔන් ද ඔරියන්ට් එක්ස්ප්‍රස් – ඇගතා ක්‍රිස්ටි ( Murder on the Orient Express by Agatha Christie) චාර්ල්ස් ලින්ඩ්බර්ග් ගේ උරුමකරු වූ මාස 20ක් වයසැති දරුවෙකු පැහැරගෙන ගොස් ඝාතනය කිරීම පිළිබඳ සිදුවීම එකල ජාත්‍යන්තර පුවත්පත්වල පවා සිරස්තලයක් විය. වසර දෙකකට පසු ඇගතා ක්‍රිස්ටි එම සිදුවීම පාදක කරගෙන මෙම කතාව ලියන විටත් එම සිදුවීම වාද විවාද වලට ලක්වෙමින් නොවිසඳී තිබුණු.

විතවුට් අ කන්ට්‍රි – අයිසේ කුලින් ( Without a country by Ayse Kulin) දෙවන ලෝක යුද්ධ සමයේදී තුර්කි රජය විසින් හංගේරියානු මහාචාර්ය ෆිලිප් ශ්වොර්ට්ස් ඇතුළු යුදෙව් විද්‍යාර්ථින් ගණනාවකට ආරක්ෂාව සැපයීය. මෙම කෘතියේ දී කර්තෘ කුළින් විසින් එම මහාචාර්ය ශ්වොර්ට්ස් සිය පවුල සමඟ නාසින්ගෙන් බේරී තුර්කිය තම නිවස කරගත් අයුරු විස්තර කරනවා.

ද රෙවනන්ට් – මයිකල් පන්ක් ( The revenant by Michael Punke) 1823 දී ලොම් සඳහා දඩයම් කරන්නෙකු වන හියු ග්ලාස්ව විශාල වලසෙකුට හසුවී තුවාල ලැබීමෙන් පසු ඔහුව මැරෙන්නට දමා ඔහුගේ සගයන් පලා යයි. කෙසේ නමුත් ආහාරපාන ආදී කිසිදු සැපයුමක් නොමැතිව ඔහු ජීවත් වන අයුරුත්, ඔහුව දමා පලා ගිය සගයන්ගේ අඩි සලකුණු ඔස්සේ නැවත පැමිණෙන අයුරුත් මෙම කතාවේ දැක්වෙනවා. මේ වන විට ලියනාඩෝ ඩි කැප්රියෝ රඟන චිත්‍රපටයක්ද මේ ආශ්‍රයෙනි නිමවී තිබෙනවා.

අ ලෝන්ග් වෝක් ටු වෝටර් – ලින්ඩා සු පාර්ක් (A long walk to water by Linda Sue Park) 1987 සිට 2005 දක්වා වූ දෙවන සුඩාන සිවිල් යුද්ධය අවධියේදී සටන් නිසා පිරිමි ළමුන් 40 000කට අධික පිරිසක් රටේ තැන් තැන් වල අතරමං විය. ඔවුන් ජීවත්වීමට ස්ථානයක් සොයමින් නිදැල්ලේ ජීවත් වූ අතර අවුරුදු 12 ත් 18 ත් අතර නව යොවුන් පාඨකයන් සඳහා ලියැවුණු මෙම කෘතියේ සුඩාන පිරිමි ළමයෙකු සහ ගැහැණු ළමයෙකු සම්බන්ධ කතාවක් ඉදිරිපත් කෙරේ.

මිස් බර්මා – චාර්මෙන් ක්‍රේග් (Miss Burma by Charmaine Craig)කර්තෘ ක්‍රේග් ගේ මව බුරුමයේ කිරුළු පැළඳි පළමු රූ රැජින විය. ඒ බුරුමය ඒකාධිපතිත්වයකට යටත්වීමට සුළු කලකට පෙරයි. කෘතියේ දැක්වෙන්නේ ක්‍රේග් පවුලේ පරම්පරා ගණනක්‌, බුරුම ඉතිහාසයේ මෙම අසීරු, කැරළි සහිත, කලබලකාරී සමය ගතකල අයුරුයි.

ශින්ඩ්ලර්ස් ආර්ක් – තෝමස් කෙනීලි ( Schindler’s Ark by Thomas Keneally) ජර්මානුවන් විසින් යුදෙව්වන් සමූලඝාතනය කළ සමයේදී ව්‍යාපාරිකයෙකු වූ ඔස්කාර් ශින්ඩ්ලර් විසින් පෝලන්ත යුදෙව් ජාතිකයන් 1200 දෙනකුට අධික පිරිසකගේ ජීවිත රැක ගත්තේ ඔවුන් සියලු දෙනාටම තමන්ගේ අවි ආයුධ කම්හලේ රැකියා ලබා දීමෙනි. කර්තෘ තෝමස් කෙනීලි හට මෙම කෘතිය වෙනුවෙන් ජාත්‍යන්තර බුකර් සම්මානය පවා පිරිනැමිණි.

අ බ්‍රීෆ් හිස්ට්‍රි ඔෆ් සෙවන් කිලින්ග්ස් – මාර්ලෝන් ජේම්ස් ( A brief history of seven killings by Marlon James) මාර්ලෝන් ජේම්ස් හට බුකර් සම්මානය දිනා දුන් මෙම කෘතිය සඳහා පාදක වුනේ රෙගේ සංගීතයේ පුරාවෘත්තය වූ බොබ් මාර්ලේ ඝාතනය කිරීමට තැත් කිරීමේ සිදුවීමකුයි.

ද ගර්ල්ස් – එමා ක්ලයින් ( The girls by Emma Cline)1968 දී මැන්සන් පවුල විසින් මිනිසුන් පස් දෙනකු මරා දමන්නේ ඔවුන්ගේ පවුලේ ප්‍රධානියා වූ චාල්ස් මැන්සන්ගේ අණ පරිදිය. එම පවුලේ තිදෙනෙක්ම ගැහැණු ලමුන් වීම, එම සිදුවීමට වැඩි අවධානයක් හා ප්‍රසිද්ධියක් ලබා දීමට හේතුවිය. එම සිදුවීම් පාදක කරගෙන ලියා ඇති මෙම කෘතියෙන් එමා ක්ලයින්, එම සිදුවීම පිළිබඳ ගැහැණු ළමුන්ගේ කෝණයෙන් ලිවීමට උත්සාහ කර ඇත.

ද වන් ඇන්ඩ් ඔන්ලි අයිවන් – කැතරින් ඇපල්ගේට් (The one and only Ivan by Katherine Applegate) මෙම කතාවේ අයිවන් යනු කොංගෝ ගෝරිල්ලකු වන අතර, ඌ කුඩා අවධියේදී මිනිසුන් විසින් අල්ලාගෙන විත් වසර 27ක්‌ පුරාවට වොෂින්ටන්හි සාප්පු සංකීර්ණයක ප්‍රදර්ශනයට තබා තිබුනි. ගෝරිල්ලාගේ කෝණයෙන් ලියා ඇති මෙම කෘතිය මගින් එම වසර 27 පුරාවට ගෝරිල්ලා ගතකළ ජීවිතය සහ එයින් පැන යාම පිළිබඳ අපූරුවට විස්තර කෙරේ.

ඕර්ෆන් නම්බර් එයිට් – කිම් වෑන් ඇල්කමේඩ් ( Orphan number eight by Kim Van Alkemade)ඇල්ෆ්‍රඩ් F. හෙස් යනු විසිවන සියවස මුල් භාගයේ නිව්යෝර්ක් හීබෘ ළමා අනාථ නිවාසයක සේවය කළ වෛද්‍යවරයෙකි. ඔහු තමා බාරයට පැමිණෙන ළමුන් යොදාගෙන විවිධ පරීක්ෂණ සිදු කළේය. මෙම කතාවේදී ඔහු සඳහා වෛද්‍ය මිල්ඩ්රඩ් සොලමන් යන නාමය යොදාගෙන ඇත. ඔහුගේ කුරිරු පරීක්ෂණ වලට වසර ගණනාවක් තිස්සේ ලක්වූ ළමයෙකු පසුකාලීනව ඉන් පැන යාමත්, එයිනුත් වසර ගණනාවකට පසු එම ළමයා හෙදියක් ලෙස සේවයක් කරන විට ඇගේ රෝගියා ලෙස පිළිකාවකින් පෙළුණු එම වෛද්‍යවරයාවම හමු වීමත් යන සිද්ධිය වටා ගෙතුණු කතන්දරයක් “Orphan number eight” යටතේ විස්තර කෙරේ.

ඉන් ද ටයිම් ඔෆ් ද බටර්ෆ්ලයිස් – ජූලියා අල්වාරෙස් ( In the time of the butterflies – Julia Alvarez) පැට්‍රියා, මිනර්වා, මාරියා තෙරේසා සහ මිරාබෙල් යනු 1950 දශකයේ දී ඩොමිනික් රාජ්‍යයේ ඒකාධිපතියා රෆායෙල් ට්රුජිලෝට එරෙහි වූ නිර්භීත සොහොයුරියන් සිව් දෙනෙකි. එයින් සොහොයුරියන් තිදෙනෙකුම මරා දැමුණු අතර ජූලියා අල්වාරෙස් වැනි බොහෝ ඩොමිනික් වැසියන්ට ආදර්ශයක් හා ආඩම්බරයක් වූ කාන්තා දේශප්‍රේමි සංකේතයන් බවට ඔවුන් පත් විය.

එව්රි මෑන් ෆෝ හිම්සෙල්ෆ් – B. බේන්බ්‍රිජ් ( Eve5man for himself by Beyrl Bainbridge) මෙම කෘතිය කොටස් 4කින් යුක්ත වන අතර ඒ එක් එක් කොටස සිය මංගල ගමන සිදුකල ටයිටැනික් නෞකාවේ එක් එක් දිනය සඳහා වෙන් වේ. කතාව පවසන පුද්ගලයා ලෙස මනඃකල්පිත චරිතයක් යොදා ගෙන ඇති අතර එම තැනැත්තාට සැබෑ ජීවිතයේ එම නෞකාවේ ගමන් කළ විවිධ පුද්ගලයන් හමු වූ අයුරු සහ එම පුද්ගලයන් මෙම ඛේදවාචකයට මුහුණ දෙන අයුරු විස්තර කරනවා.

ඉයර් ඔෆ් වොන්ඩර්ස් – ජෙරල්ඩින් බෘක්ස් (Year of wonders by Geraldine brooks) 1666 වසරේ දී යුරෝපයේ පැතිර ගිය වසංගතයකින් ආරක්ෂා වීමට එයම් නම් ගම්මානයෙහි මිනිසුන් කටයුතු කළ අයුරුත්, සෙසු ලෝකයාගෙන් වෙන්ව ගම්මානය සම්පූර්ණයෙන්ම අගුළු දැමූ අයුරුත් එම නිරෝධායන සමයෙහිදී එහි ජීවත් වූ සේවිකාවක් වූ ඇනා ගේ දෘෂ්ටිකෝණයෙන් විස්තර කෙරේ.

Leave a Reply

Your email address will not be published.

Copyright © All rights reserved. | Newsphere by AF themes.