Hela Rahas

Hela Rahas Official Web Portal

රාමායනය ර‍ාවණාව දුෂ්ඨයෙක් කලේ ඇයි?

  • දැනට අවුරුදු 6000කට විතර කලින් හෙළයේ පහළ වුන ශ්‍රේෂ්ට මිනිසා තමා මහා රාවණ. රාවණගේ යුගය ගැන අපෙ ලංකාවෙ ලිඛිත ඉතිහාසයේ වැඩි දෙයක් සඳහන්ව නැතත් ඉන්දියානු ඉතිහාසයේ ඔහු ගැන දීර්ඝ විස්තරයක් කිරීමට චාල්මිකී සමත් වී ඇත. එය අපිට රාවණා ඉතිහාසය ගැන දැනගන්න ඇති හොඳම මාර්ගය කියනවනම් නිවැරදියි.
  • ඒත් චාල්මිකී ලියන ලද රාමායනයේ රාවණ ඉදිරියේ කළු පැල්ලමක් තබන්නට ඔහු උත්සාහ දරා ඇත්තේ සමහර විට එවකට ඉන්දියානු පාලකයන්ගේ බලපෑම නිසා වන්නටත් පුළුවන්. ඒ නිසාම රාවණගේ ඇත්ත කතාව මොකක්ද කියල ගොඩක් අය සොයනවා.
  • සැබැවින්ම රාවණ යනු විශ්වීය මෙන්ම විශ්මීය මිනිසකු යැයි අපට සිතෙන්නේ ඔහු ඉන්දියාවේ කොටසක් හා සමස්ත ලංකාවම පාලනය කළ නිසාම නෙමේ. ඒ ඔහු සතුව තිබුන අධිතාක්ෂණික ක්‍රමවේදයන් ගැන ඥානය නිසාත්ය.
  • මීට අවුරුදු 6000කට කලින් ගුවන්යානා නිපදවිය හැකි තාක්ෂණයක් හා අදහාගත නොහැකි තරම් පුදුම සහගත වූ වෛද්‍ය විද්‍යාවක් ලංකාවේ තිබුනා කියලා චාල්මිකී විසින් මුල් වතාවට ලොවට හෙළිකර ඇත. ඒ වුණාට රාම-රාවණා යුද්ධයේදී එම රහස් සියල්ල වැළලී ගිය ආකාරයත් ඔහු රාමායනය මගින් පෙන්වාදෙනවා.
  • කොහොම වුනත් ලංකා රාජ්‍යය ගොඩනැගුවේ රාවණ නෙමේ. එය ගොඩනැගුවේ ඔහුගේ ආදීතම මුතුන්මිත්තන්. ඒ මුතුන්මිත්තන් අතරින් සූර්යපුත්‍ර, සූර්යපුත්‍රගේ පුතා ධර්මරාජ, ඔහුගේ පුතා හේතිරාක්ෂස, ඔහුගේ පුතා විද්‍යුත්කේෂ, ඔහුගේ පුතා සුකේෂ හා සුකේෂගේ පුතා සුමාලි (රාවණාගෙ මුත්තනුවන්) ප්‍රධානතම වේ. සුමාලිගේ පුතා පුලත්‍ය ඍෂිවරයාණන් වූ අතර, ඔහුගේ පුතා වුනේ විශ්‍රාවාස මුනිවරයා. ඒ රාවණගේ පියාණන්.
  • රාවණ ඉපදී ඇත්තේ ලංකාවේ නෙමේ. ඔහු ඉපදී ඇත්තේ ඉන්දියාවේ නර්මදා ගඟ අසබඩ ප්‍රදේශයක. සුමාලි මුත්තණුවන් විසින් ඉතා දියුණු රාජ්‍යයක් බවට පත්කර තිබූ ලංකා රාජ්‍ය නැත්නම් මිණිමිහි දේශය ඒ වනවිට පාලනය කළේ වෛශ්‍රවන නම් රජෙක්. කූඨ උපක්‍රමයක් මගින් ලංකා රාජ්‍යය තමන් යටතට ගත් වෛශ්‍රවන එහි සැබෑ උරුමක්කරුවන්ගෙන් උදුරා‍ගෙන පාලනය කළා.
  • භාරතය පුරා පැතිරී තිබූ සත්ත්ව බිලිපූජා හා බමුණන්ගේ හිංසාවාදී ආගමික පිළිවෙත්වලට විරුද්ධව යමින් සුමාලි විසින් කරන ලද යුද්ධයේදී බමුණන් පළවාහැරීමට සුමාලිට හැකිවුනත් විෂ්ණු නමැති පාලකයා විසින් සුමාලි පරාජයට පත්කර ලංකා රාජ්‍යය වෛශ්‍රවනට පවරා දී ඇත.
  • රාවණගේ පරපුර යනු අතිශය අවිහිංසාවාදී හා සියලු සත්වයන්ගේ සුභසිද්ධිය උදෙසා දැවැන්ත අරගල කරන ලද පරපුරක් බව ඉතිහාසය සාක්ෂ්‍ය දෙයි. ඒත් රාමායණය රාවණා පරපුර සමාන කරන්නෙ රාක්ෂයන්ට. සත්ව හිංසනයට එරෙහි වුන ඔවුන්ව රාක්ෂයන්ට සමාන කිරීමම රාමායණය රාවණාට එරෙහිව කතා කළ බව පෙන්නුම් කරනවා.
  • කොහොමහරි ලංකාවේ සැබෑ උරුමය සියතට ගත් රාවණා ඊට වසර ගණනාවකට පසුව ලංකා රාජ්‍යය යටත් කරගෙන ලංකාවේ රජු බවට පත්වන්නේ සියලු ශිල්ප ශාස්ත්‍රයන්ගේ කෙළපැමිණි රජෙක් ලෙස. ඔහු වෛශ්‍රවනට අභයදානය දී ඉන්දියාවට පිටුවහල් කරන්නේ සිරකරුවකු ලෙස නොව ඉන්දියාවේ තම පියාට අයත්ව තිබූ ප්‍රදේශයක භාරකාරත්වයටද පත්කරමින්.
  • රාවණා ලංකා රාජ්‍යයේ අගරජු බවට පත්වන්නේ තනි පුද්ගලයකු ලෙස නොව ඔහුගේ සහෝදර සහෝදරියන්ද එහි භාරකාරත්වයට පත්කර ගනිමින්. ඔහුගේ සහෝදරයන් වූ කුම්භකර්ණ, බර, දූෂණ, විභීෂණ යන අයට මෙන්ම රාවණාගේ නැගණිය වූ සුපර්ණකා කුමාරියටද රාජ්‍යයේ ඉහළ තනතුරු හිමි වුණා.
  • සුපර්ණකා එකල සමස්ත ඉන්දියාවේම සිටි අභිරූමතියක්. රාවණාගේ හා සුපර්ණකාගේ බැඳීමට සමාන සහෝදර බැඳීමක් වෙනත් පුරාවෘත්තවලින් සොයාගැනීමට අපහසු බව කියනවා. රාවණා රාජ්‍යය කරද්දී සුපර්ණකා ඔහුගේ උපදේශිකාව වූවා මෙන්ම මුලසිටම ඇගේ ක්‍රියාකලාපය පරම අවිහිංසාවාදී වූ බව රාජ්‍යයේ ඇතැම් ගැටළු නිරාකරණයේදී ගත් පියවර මගින් පෙනෙනවා.
  • රාජ්‍ය පාලනයේදී රාවණ විසින් ගත් වැරදි සහගත තීරණයක්ද ඇත. එනම් විභීෂණට යුවරාජ තනතුර ලබාදීම. විභීෂණ කුඩාකල සිටම රාවණට ප්‍රතිවිරුද්ධ පාර්ශ්වය නියෝජනය කළ පුද්ගලයෙකි. ඒ ගැන දැන දැනත් තම සහෝදරකම සලකා රාවණා විසින් ඔහුට යුවරාජ තනතුර ලබාදෙන්නේ මතුවන විපත දැනද, නොදැනද යන්න පැහැදිලි නොවේ.
  • කෙසේ වුවද රාවණ ලංකාපුරය ලෝකයේ ශ්‍රේෂ්ටතම රාජ්‍යය බවට පත්කර පරම අවිහිංසාවාදය පතුරවමින් මෙතෙක් කිසිවකට සමකළ නොහැකිවූ අධිතාක්ෂණික මෙවලම් නිෂ්පාදනය කරමින්, නොයෙකුත් විද්‍යාවන් පිළිබඳ පොතපත ලියමින් රාජ්‍ය පාලනය ගෙන ගොස් ඇත.
  • ඉතිං මේ කාලෙදි තමා යාගහෝම කරමින් බිලිපූජා පවත්වමින් තම පැවැත්ම සකස් කරගෙන සිටි ඉන්දියාවේ බමුණන් රාවණගේ නීතිරීති නිසා තවදුරටත් එම කටයුතු සිදුකරගත නොහැකිව රාවණ කෙරෙහි වෛර බඳිමින් ඔහු විනාශ කිරීමට නොයෙකුත් කූඨ උපක්‍රම ක්‍රියාත්මක කිරීමට පටන්ගන්නේ.
  • භාරතයේ දශරථ රජුගේ පුත්‍රයන් දෙන්නා වුන රාම හා ලක්ෂ්මණ් මේ කටයුත්ත සඳහා යොදාගනු ලබයි. වනවාසයට ගොස් සිටින රාම හා ඔහුගේ බිරිඳ සීතා මෙන්ම ලක්ෂ්මන් ද දැන හෝ නොදැන බමුණන්ගේ මෙම උපක්‍රමවලට හසුවෙනවා.
  • රාම යනු මහා උතුමෙක් ලෙස රාමයනයේ සඳහන් වුවද, ඔහු ස්ත්‍රීන් කෙරෙහි ලොල්වූ පුද්ගලයකු බව අපට පෙනෙන්නේ රාවණගේ නැගණිය වන සුපර්ණකා කුමරිය මහවනයේදී රාමාට මුණගැසීමත් සමඟ. සුපර්ණකා දුටු පමණින් රාම ඇයට වශී වී සීතාද අමතක කර දමන්නට තරම් නින්දිත වී ඇත. ඒත් මෙය නොඉවසන ලක්ෂ්මණ් බමුණන්ගේ ඉගැන්වීම් මත සුපර්ණකාගේ කන් හා නාසය කපා දමන්නට තරම් සැහැසි වේ.
  • කොහොම වුනත් අන්තිමට අවුරුදු 10 ක් විතර දීර්ඝ වූ මහා යුද්ධයක ආරම්භය සනිටුහන් වන්නේ සුපර්ණකා කුමාරිගෙ සිදුවීම නිසා. සුපර්ණකාගේ සිදුවීමට රාමගෙන් පළිගැනීමක් ලෙස රාවණා විසින් පුෂ්පක යානයෙන් සීතා රැගෙන ලංකාවට පැමිණෙයි. ඒත් සීතාව සිරකාරියක් ලෙස සිරකර තැබීමට රාවණා කිසිම විටකදී උත්සාහ නොකරයි. සිරගෙයක් වෙනුවට අශෝක උයනේ මනරම් නිවසක් සාදවා සීතාව එහි රඳවා තබන රාවණා, රාමාත් සමඟ යුදවැදීමට කිසිම උත්සාහයක් නොදැරුව බව කියනවා.
  • සාකච්ඡා කර ගැටළුව නිරාකරණය කරගැනීමට රාවණා දරන උත්සාහය අවසානයේදී අසාර්ථකවන්නේ දිගින්දිගටම රාම හා ලක්ෂ්මණ් බමුණන් සමඟ එක්වී යුද්ධයකට අර ඇඳීම නිසා. එහිදී විභීෂණ තම සොහොයුරා වන රාවණගේ සියලු යුද රහස් රාමා අතට පත්කොට රාවණ පරදවාලීමට ඔහුගේ උපරිම දායකත්වය රාමාට හිමිකරදෙන්නේ රටත්, ජාතියත් මහා පාවාදීමකට ලක්කරමින්. අවුරුදු 10 ක යුද්ධයෙන් පසුව රාවණ නම් අසහාය යුගපුරුෂයා, සුපර්ණකා කුමරියට සියලු දේ පවරා දී මිය යයි.
  • රාමාට හෝ ලක්ෂණ් ටද මෙයින් කිසිදු යහපතක් නොවේ. සීතාව නිදහස් කරගත්තද බමුණන්ගේ‍ කේළාම් අසා පතිවත රැකියෙ නෑ කියලා රාමා ඇය අත්හැර දමයි. ඒ වනවිට ඇය රාමාගෙන් නිවුන් දරුවන් දෙදෙනකු ලබාසිටියද රාමාට ඒ කිසිවක් වැදගත් වුනේ නෑ. ඒ වගේම අග්නි පරීක්ෂණයේදී සීතාගේ නිර්දෝෂීභාවය ලෝකයටම හෙළිවූ බව වාල්මිකීගේ රාමායනයේ සඳහන්.
  • පසුව රාමාගේ නොසැලකිල්ලෙන් සීතා හෙළකින් පහලට පැන සියදිවි නසාගන්නා අතර, ලක්ෂ්මණ් ද රාමාගේ පිළිකුල් සහගත ක්‍රියාකලාපය නිසා අයෝධ්‍යවේ සයුර ගගට පැන සියදිවි නසා ගනී. අන්තිමට රාමාද අයෝධ්‍යවේ සයුර ගඟටම පැන සියදිවි නසාගත් බව ඉතිහාසයේ සඳහන්. විභීෂණ ලංකාපුරයේ රජ වුවත් ඔහුගේ අවසාන කාලය දක්වා මිනිසුන් ඔහු රජකු ලෙස පිළිනොගත් බව සඳහන් වේ.
  • අදටත් ඉන්දියාවේ රාවණාගෙ රූපයට ගිනි තබා විනාශ කරනවා. ඒ ඉස්සර කාලෙ ඉදන් එන මිත්‍යා නිසා. යහපත් විදියට රට පාලනය කළ, අවුරුදු 10 ක් ලංකාවේ තබාගෙන සිටි සීතාගෙ පතිවතට හානි නොකළ රාවණා ඇත්තටම නරක පාලකයෙක්ද? රාවණාව රාමායණය තුළ එලෙස වැරදි කරුවෙක් කලේ ඒ කාලේ බමුණු බලපෑම නිසා වෙන්න ඉඩකඩ වැඩි බව පැහැදිලියි.